Rapportere mjølk som er levert til meieri

Desse tilskota kan meieriet be om refusjon for

Rapporteringa er grunnlag for refusjon av

• grunntilskot for geitemjølk
• pristilskot ku- og geitemjølk
• grunntilskot for økologisk ku- og geitemjølk

Desse avgiftene inngår i oppgjeret

Rapporteringa gir grunnlag for innbetaling av desse avgiftene

• omsetnadsavgift
• overproduksjonsavgift mjølk
• forskingsavgift

Nytt meieri

Nye meieri som ønsker å bli godkjent som tilskotsformidlar, kan ta kontakt med Landbruksdirektoratet.

Rapportere

For å rapportere mjølk skal meieriet sende opplysningar om dagsleveransane til produsentane i skriftleg oppgåve og som datafil til Landbruksdirektoratet. Ta kontakt med Landbruksdirektoratet for meir informasjon om filformat, adresse og brukarnamn til Landbruksdirektoratet sin server.

Rapporteringsfrist: Så snart meieriet har køyrt avrekning, og seinast innan den 10. kvar påfølgande månad etter at mjølka er levert til meieri.

Rapporteringsfila skal innehalde

• kven som rapporterer (meieri)
• år og månad rapporteringa gjeld for
• kommunenummer, gardsnummer, bruksnummer og festenummer for eigedommen som er driftssenteret til føretaket
• sone for pristilskot ku- og geitemjølk
• organisasjonsnummeret til mjølkeprodusenten
• hentedato for alle dagsleveransar
• varekode (mjølketype, konvensjonell eller økologisk, kassert)
• liter mjølk
• hentestad for alle dagsleveransar representert med koordinatane for punktet der mjølka er henta oppgitt som latitude og longitude

Mottak 

Når Landbruksdirektoratet har fått elektronisk rapportering, blir opplysningane sjekka i ein inputkontroll før innlesing i fagsystemet vårt. 

Etter rapportering får meieriet ei kvitteringsfil med eventuelt feilmelde leveransar. Meieriet har ansvar for at feilmelde leveransar som ikkje er innlesne, blir rapportert på nytt så snart som mogleg etter at feilen er korrigert.

Leveransar med følgande varselmeldingar blir avvist og må bli rapportert på nytt

• kode 1010 «Foretaket er ikke registrert i Landbruksregisteret»
• kode 1050 «Eiendommen er ikke registrert i Landbruksregisteret»
• kode 3000 «Landbruksdirektoratet må legge inn sone på eiendommen i LDB»
• kode 3010 «Innrapportert melkesone avviker med registrert melkesone på eiendommen» 

Det skal vere samsvar mellom opplysningane i den skriftlege oppgåva og innrapporterte data til Leveransedatabasen. Ved innsending av oppgåva stadfestar meieriet at opplysningane i oppgåva er fullstendige og korrekte. Månadsoppgåva er grunnlag for refusjon av formidla tilskot. Ved behov for meir informasjon, kan direktoratet be om dette.

Behandling

Meieriet følger opp feil med kode 1010 og 1050, og retter feil i eige system før dei rapporterer avviste leveransar på nytt.

Landbruksdirektoratet følger opp feil med kode 3000 og 3010, og varslar meieriet når dei kan rapportere avviste leveransar på nytt.

Landbruksdirektoratet bruker opplysningane til å kontrollere grunnlaget for omsetnads- og overproduksjonsavgift på mjølk som meieria krev inn frå mjølkeprodusent på vegner av direktoratet. Dei same opplysningane er grunnlag for forskingsavgift som meieriet skal betale til direktoratet for mjølk som dei har kjøpt frå produsent.

Opplysningane er også grunnlag for kontroll av pristilskot mjølk som produsenten kan få utbetalt via tilskotsformidlar (meieri) for mjølk som er levert innanfor mjølkekvote.

Etter kontroll, bereknar Landbruksdirektoratet kor mykje tilskot meieriet skal få refundert, og motreknar dette mot avgifter som meieriet skal betale. Oppgjeret blir utbetalt eller blir fakturert, avhengig av om det er Landbruksdirektoratet eller meieriet som skylder den andre pengar.

Svar

Meieriet får svar på rapporteringa, normalt 1 veke etter rapporteringsfristen.

Oppgjer

Får meieriet refundert meir i tilskot enn dei skal betale i avgifter, blir pengane automatisk overført til konto. Det er Landbruksdirektoratet som utbetaler pengane. Skal meieriet betale meir i avgifter enn dei får refundert i tilskot, får dei ein faktura med normalt 14 dagars betalingsfrist.

Tilbakebetaling og avkorting

Dersom det er gjort feil i utbetalingar, ved regelbrot eller du har gitt feil opplysningar, kan Landbruksdirektoratet krevje tilbakebetalt og/eller avkorte tilskotet. 

Revisorattestert årsoppgåve

På slutten av året skal meieriet sende oppgåve stadfesta av revisor, over kor mykje mjølk som er levert til meieriet, og kor mykje som er trekt i omsetnads- og overproduksjonsavgift frå produsentane. Meieriet skal også sende oppgåve stadfesta av revisor over kor mykje mjølk som har rett til tilskot, og som det er utbetalt tilskot for.

Skjema for Revisorattestering for avgifter for mjølk (LDIR-816)