Doarjja boazodoalu areálaid sihkarastimii

Don sáhtát ohcat doarjaga čuovvovaš doaimmaide:

• Hábmet gulaskuddancealkámušaid sisabahkkemiid oktavuođas
• Doaibmabijuide maidda boazodoallu dárbbaša kártema ja mat eai leat váikkuhusčielggadeamis mielde mearrádusaid plánen- ja huksenlága vuođul
• Hábmet vuoruhankártta (areálageavahuskárttaid árvoklassifiseren)

Doarjaga váldoulbmil leat stuorit doaibmabijut areálasisabahkkemiid geažil, ovdamearkka dihte gulaskuddancealkámušat, čielggadanbargguide ja nu ain viidásit.

• Jus orohagas lea dárbu ráđđeaddimii guohtunareálaid sihkarastima dihte, de sáhttá oažžut doarjaga Boazodoalu Ovdánahttinfoandda (BOF) bokte.
• Doaibmabidju galgá ovddidit boazodoalu orohagas ja guovllus, ja doaibmabidju galgá árvvoštallojuvvot dan ektui, makkár váikkuhusat das leat guohtunareálaid gollamii guohtuma dihte ja muđui birrasa ektui.
• Doarjaga ii sáhte oažžut doaibmabijuide mat leat gullevaččat váikkuhusčielggadangeatnegasvuhtii plánen- ja huksenlága bokte, go váikkuhusčielggadanbarggu olggosgoluid galgá doaibmaálggaheaddji gokčat.

Ohcamuššii galggat bidjat mildosiid mat duođaštit maid leat juo golahan dahje maid boađát golahit doaibmabiju dihte. Dat sáhttet ovdamearkka dihte leat rehkegat konsuleantaveahkis, guittet mat duođaštit olggosgoluid mátkkošteapmái ja orrumii čoahkkimiid geažil jna. Mii ávžžuhit ahte álggát dainna bargguin buori áiggis ovdal ohcanáigemeari.

Geavat skovi Doarjja boazodoalloareálaid sihkarastimii go ozat.

Skovvái galggat deavdit

• Oktavuođadieđuid (orohatnamma, organisašuvdnanummár, kontonummár jna.)
• Makkár doaibmabidjui ozat doarjaga
• Ohcansupmi
• Makkár mildosat ohcamuššii leat

Dasa lassin galggat bidjat mildosiid olggosgoluide mat dus juo leat leamaš dahje bohtet leahkit doaibmabiju dihte masa leat ohcan doarjaga, nu go:

• Rehket konsuleanttas konsuleanttaveahki ovddas
• Guittet mat čájehit olggosgoluid mátkkošteami ja orruma ovddas čoahkkimiid jna. oktavuođain.
• Duođaštusat eará áššáiguoskevaš olggosgoluide

Sádde ohcamuša mildosiiguin Eanandoallodirektoráhttii e-poastta bokte postmottak@landbruksdirektoratet.no dahje poastta bokte Landbruksdirektoratet, Postboks 1450 Vika, 0116 Oslo. Don oaččut duođaštusa ahte ohcamuš lea boahtán dan čujuhussii gos ohcamuš sáddejuvvui.

Go Eanandoallodirektoráhtta lea ožžon ohcamuša, de sii gehččet dieđuid maid leat addán. Jus dárbbašit, de sáhttet bivdit dus eambbo dieđuid.

Eanandoallodirektoráhtta meannuda ohcamuša ja sáddejit iežaset evttohusa Boazodoalo Ovdánahttinfondii. Foandastivra dahká áššemearrádusa.

Ohcamuš sáhttá dárkkistuvvot. Don leat geatnegahtton dohkkehit dárkkisteami, addit dárbbašlaš dieđuid ja veahkehit dárkkisteami čađahemiin. Dárkkisteapmi sáhttá maŋidit áššemeannudeami.

Don oaččut vástádusa juogo e-poasttas dahje reivves poasttas. Jus leat ohcan doarjaga mii lea 200 000 ruvnno dahje unnit, de Eanandoallodirektoráhtta meannuda ášši hálddahuslaččat. Áššemeannudeapmi lea dábálaččat njeallje vahkku maŋŋel go ohcamuš bođii.

Jus ozat doarjaga badjel 200 000 ruvnno, de du ohcamuš ovddiduvvo BOF-stivrii. BOF-stivrras leat dábálaččat njeallje čoahkkima jagis, dat dagaha ahte áššemeannudeapmi sáhttá váldit guhkit áiggi go dalle jus hálddahuslaččat meannuduvvo.

Jus doarjja juolluduvvo, dalle oaččut 50 proseantta doarjagis go mearrádus lea dahkkon. Loahppadoarjja mákso go rehketdoallu ja duođaštusat lea sáddejuvvon ja dohkkehuvvon Eanandoallodirektoráhtas. Eanandoallodirektoráhtta dat máksá doarjaga.

Don sáhtát váidit mearrádusa. Váidaga galggat sáddet Eanandoallodirektoráhttii. Eanandoallo- ja biebmodepartemeantta meannuda váidaga jus Eanandoallodirektoráhtta ii rievdat mearrádusa áššis.

Váidináigemearri lea golbma vahkku dan rájes go mearrádus bođii du lusa. Váidda galgá leat sáddejuvvon ovdal váidináigemeari. Dat mearkkaša ahte váidagis galgá leat poastasteampil mii čájeha ahte váidda lea sáddejuvvon ovdal váidináigemeari jus váidda sáddejuvvo poastta mielde, ja jus sáddejuvvo e-poastta bokte, de galgá sáddejuvvon ovdal dii. 23.59 dan beaivvi go váidináigemearri lea.

Jus lea boastut máksojuvvon, jus njuolggadusat leat rihkkojuvvon dahje don leat addán boasttudieđuid, de sáhttá Eanandoallodirektoráhtta gáibidit ahte mávssát ruovttoluotta doarjaga ja/dahje unnidit doarjaga supmi.