Liigedoarjja roassogearggusvuhtii boazodoalus

Orohat/boazosearvi sáhttá ohcat doarjaga čađahit dárbbašlaš doaibmabijuid máksomeriin 4,50 ruvnno bohccos jándoris ja doarjaga sirdit bohccuid dálveorohagas geasseorohahkii máksomeriin 0,18 ruvnno bohccos juohke kilomehteris njuolggadusa doarjagiid birra orohagaide ja boazoservviide, kapihttal 4 vuođul.

Doarjaga meroštallanvuođđu:

• siiddaid dahje boazoservviid boazolohku gos gearggusvuođalávdegoddi lea cealkán ahte lea ealátroassu
• boazolohku boazodoallodieđáhusas (31. beaivvi maŋemus boazodoallojagis) lea vuođđun doarjaga supmi meroštallamii. Ii sáhte oažžut doarjaga bohccuid ovddas mat rihkkot siidda dahje boazosearvvi mearriduvvon bajimus boazologu.

• Gearggusvuođalávdegoddi galgá cealkán ahte lea ealátroassu dan orohagas/boazosearvvis man ovddas ohcá doarjaga.
• Doarjaga sáhttá oažžut go lea mannán unnimusat 30 jándora dan rájes go gearggusvuođalávdegoddi celkkii ahte lea guohtunroassu du orohagas/boazosearvvis. 

Orohat/boazosearvi galgá duođaštit ahte ruhta sierra báŋkokonttus roassogearggusvuhtii ii leat doarvái.

Boazodoalu ovdánahttinfoanda (BOF)

Geavat skovi Boazodoalu roassogearggusvuođa liigedoarjaga ohcanskovvi (LDIR-672) ohcat.

Ohcanáigemearri: jotkkolaš

Skovvái galggat registreret

• gii ohcci lea
• deavdá go orohat/boazosearvi doarjaga eavttuid

Dasa lassin galgá orohat/boazosearvi bidjat mielddusin

• vejolaš cealkámuša gearggusvuođalávdegottis doaibmabijuid birra je.

Sádde ohcamuša mildosiiguin stáhtahálddašeaddjái iežat orohagas e-poastta dahje dábálaš poastta bokte.

Iešguđetge stáhtahálddašeddjiin soitet iešguđetlágan vuogit máhcahit duođaštusa ahte leat sádden ohcama.

Go stáhtahálddašeaddji lea ožžon ohcamuša, de sii isket dieđuid maid orohat/boazosearvi lea addán. Jus sii dárbbašit eanet dieđuid, de sii sáhttet bivdit daid oažžut.

Ohcamuš sáhttá dárkkistuvvot. Don leat geatnegahtton dohkkehit dárkkisteami, addit dárbbašlaš dieđuid ja veahkehit čađahit dárkkisteami. Dárkkisteapmi sáhttá maŋidit áššemeannudeami.

Orohahkii/boazosearvái boahtá vástádus ohcamuššii e-poastta dahje poastta bokte.

Jus orohahkii/boazosearvái juolluduvvo doarjja, de máksojuvvo ruhta orohaga/boazosearvvi sierra báŋkokontui roassogearggusvuođa váste. Kontonummára galgá deavdit ohcanskovvái. Eanandoallodirektoráhtta dat máksá.

Orohat/boazosearvi sáhttá váidit áššemearrádusa. Váidaga galgá sáddet stáhtahálddašeaddjái. Jus stáhtahálddašeaddji ii rievdat áššemearrádusa nu go orohat/boazosearvi háliida váidagis, de Eanandoallodirektoráhtta meannuda váidaga ja dahká loahpalaš áššemearrádusa.

Váidináigemearri: 3 vahku

Jus lea boastut máksojuvvon, jus njuolggadusat leat rihkkojuvvon dahje orohat/boazosearvi lea addán boasttudieđuid, de sáhttá Eanandoallodirektoráhtta gáibidit ahte doarjja máksojuvvo ruovttoluotta ja/dahje unnidit doarjaga.