Njuvvojuvvon bohccuid raporteren
Njuovahagat leat geatnegahtton raporteret njuvvojuvvon bohccuid ja bohccobierggu vuorkáhivvodaga mánnosaččat.
Geat galget raporteret?
Almmolaččat dohkkehuvvon njuovahagat mat njuvvet bohccuid galget raporteret njuvvojuvvon bohccuid Eanandoallodirektoráhttii. Sii geat vurkejit bohccobierggu galget raporteret vuorkáhivvodaga Eanandoallodirektoráhttii.
Proseassa birra:
Ovdal go ozat
Oanehaččat ortnega birra
Njuovahagat leat geatnegahtton
- raporteret njuvvojuvvon bohccuid mánnosaččat
- láhčit dili registreren- ja raporterenrutiinnaide soaittáhatiskkadeami
Dispensašuvdna raporterenáigemearis
Erenoamáš oktavuođain sáhttá oažžut dispensašuvnna raporterenáigemearis.
Jus njuovahagas lea dárbu dispensašuvdnii, de ferte sáddet čálalaš dispensašuvdnaohcamuša Eanandoallodirektoráhttii. Ohcamuš galgá leat sáddejuvvon ovdal njuvvojuvvon bohccuid raporterenáigemeari. Ohcamušat mat sáddejuvvojit maŋŋel áigemeari eai meannuduvvo. Ohcamuššii galggat čilget makkár oktavuođat dagahit váttisin dahje veadjemeahttumiin raporteret áigemeari siskkobealde.
Jus dispensašuvdnaohcamuš dohkkehuvvo, de fertet liikka sáddet doarjjaohcamuša ovdal doarjaga ohcanáigemeari.
Raportta deavdin
Raporterenfiila
Excel-fiilla málle sáhttá oažžut go váldá oktavuođa Eanandoallodirektoráhtain.
Raporterenáigemearri: Mánnosaččat, ja ovdal maŋemus beaivvi dan mánus go njuvvojuvvui
Čuovvovaš dieđut galget raportii:
- boazoeaiggáda riegádannummár
- njuovahaga organisašuvdnanummár
- njuovahatmálle
- njuovvanbáiki ja buktinbáiki
- njuovvanbeaivi
- rehkenastinnummár
- njuovvandeaddu
- klássa
- buoidejoavku
- bálkestankoda (jus gorut lea bálkestuvvon)
- elliidkoda
- raporterenáigodat
- brutto- ja nettohaddi earret lassiárvodivvaga (olles goruda haddi)
- báiki gos ealli bohccot gessojuvvojit fievrredeapmái njuovahahkii
Gáibádus boazoeaiggáda riegádannummára raporterema birra ii guoskka go njuovvá bohccuid mat eai leat merkejuvvon ja juogaduvvon. Dakkár boazu galgá registrerejuvvot dan orohahkii gosa boazu gullá. Juohke orohagas lea sierra koda man galgá bidjat raportii dan sajis go iežas persovdnanummára. Kodaid sáhttá háhkat go váldá oktavuođa Eanandoallodirektoráhtain.
Sáddet raportta
Sádde raportta Eanandoallodirektoráhttii čujuhussii: reinslakt@landbruksdirektoratet.no. Raporta galgá leat excel-fiillas mii lea suodjaluvvon beassansániin ja krypterejuvvon AES-krypterenformáhtain.
Ii leat vejolaš sáddet njuovvanraportta báberhámis.
Raportta meannudeapmi
Vuostáiváldin
Go Eanandoallodirektoráhtta lea ožžon raportta, de sii isket raporttas vejolaš boasttuvuođaid ja váilevašvuođaid. Jus raportta lea devdojuvvon nu go galgá, de dat importerejuvvo fágavuogádahkii Grunnmur. Jus boasttuvuođat ja/dahje váilevašvuođat dagahit ahte fiila ii sáhte importerejuvvot, de oaččut dieđu Eanandoallodirektoráhtas njulget boasttuvuođaid dahje deavdit váilevaš dieđuid mearriduvvon áigemeari siskkobealde.
Masá dieđut geavahuvvojit
Raporttaid dieđut geavahuvvojit hálddahuslaččat dárkkistit njuvvojuvvon bohccuid meari ja bohccobierggu vuorkáhivvodaga oppalašgova hábmemii.
Vuorkáhivvodaga dieđut geavahuvvojit Vuovdinlávdegotti bargguide ja mánnosaš statistihka almmuheapmái.
Dárkkisteapmi
Dárkkisteami birra
Njuovahagat mat njuvvet bohccuid sáhttet dárkkistuvvot iskkademiid bokte. Gustovaš orohaga stáhtahálddašeaddji čađaha maŋŋeliskamiid ja njuolggoiskamiid. Eanandoallodirektoráhtta dahje stáhtahálddašeaddji čađaha soaittáhatiskamiid. Iskkadeamit čađahuvvojit almmustahttin dihte vejolaš boasttuvuođaid registreremis, raporteremis ja lohkamis.
Iešguđetlágan dárkkisteamit
Maŋŋeliskkadeapmi
Stáhtahálddašeaddji gustovaš orohagas dárkkista beljiid njuovvannummáriin ja njuovvanlisttuin maid njuovahagat leat vurken. Iskkadeami ulbmilin lea dárkkistit ahte njuvvojuvvon boazu lea rievttes eaiggádii registrerejuvvon. Iskkadeapmi dahkko maŋŋel njuovvama njuovahagas. Jus rehkenastin lea šaddan boastut, de galgá dieđihit njuovahahkii ja guoskevaš boazoeaiggádii(dda).
Njuolggoiskkadeapmi
Maŋŋeliskkadeapmi sáhttá buhtaduvvot njuolggoiskkademiin. Njuolggoiskkadeapmi dahkko njuovadettiin njuovvanbáikkis/geassinsajis.
Soaittáhatiskkadeapmi
Eanandoallodirektoráhtta čađaha soaittáhatiskkadeami registreren- ja raporterenrutiinnain.
Dehálaš dáhtonat
Raporterenáigemearri:
mánnosaččat, ja maŋemus beaivi dan mánus go njuvvojuvvui
