Rapportere slakt, ull og skinn

Rapporteringa er grunnlag for refusjon av

• grunntilskot for kjøt
• distriktstilskot for kjøt
• kvalitetstilskot for storfe
• tilskot til lammeslakt og kjeslakt
• tilskot til ull
• tilskot til pelsskinn, ulne skinn og villsauskinn

Rapporteringa er søknad om tilskot til frakt av slaktedyr. Alle slakteri som er godkjente av Mattilsynet kan søke om tilskot til frakt av slaktedyr. Dette gjeld gris, storfe og småfe.

• Store slakteri

Frakttilskot til slakteri som slaktar meir enn 1 500 tonn storfe, småfe og gris per år, blir rekna frå kommunesenteret til næraste slakteri uavhengig av om transporten skjer til eit anna slakteri. Satsane er differensierte per kommune og dyreslag. Det blir ikkje gitt tilskot for transport innanfor ei nullsone på 50 km rundt kvart slakterianlegg, eller for ferje- og bomkostnadar på strekningar som totalt sett er innanfor denne nullsona.

• Små slakteri

Frakttilskot til slakteri som slaktar mindre enn 1 500 tonn storfe, småfe og gris per år, blir rekna som ein gjennomsnittssats basert på talet på dyr kvart enkelt slakteri har henta. Satsane er differensierte per dyreslag. Det er inga nullsone rundt små slakteri.

• Mobile slakteri

Frakttilskot til mobile slakteri blir rekna som eit gjennomsnitt av satsane for små slakteri som har ein sats større enn null.

Rapporteringa gir grunnlag for desse avgiftene: 

• omsetnadsavgift
• forskingsavgift

• Slakteri og ullstasjonar pliktar å rapportere leveransedata til Landbruksdirektoratet.
• Slakteri må vere registrert i Leveransedatabasen. Ullstasjonar som omset ull må vere godkjent av Landbruksdirektoratet og all klassifisering av ull skal skje i samsvar med Norsk Ullstandard.
• Opplysningar som er oppført på avrekningane til produsent, må samsvare med det som blir rapportert til Landbruksdirektoratet. 

Nye slakteri eller ullstasjonar som ønsker å bli godkjent som tilskotsformidlar, kan ta kontakt med Landbruksdirektoratet.  

Søke om godkjenning som tilskotsformidlar for ull og skinn
Søke om godkjenning som tilskotsformidlar for kjøt 
 

For å rapportere slakt, ull og skinn kan du anten overføre opplysningane i datafil, eller bruke skjema via Altinn. 

• For å overføre datafil, ta kontakt med Landbruksdirektoratet. 
• For å rapportere, gå til skjema Innrapportering fra slakteri (ull og skinn) via Altinn. Du finn informasjon om korleis du loggar inn på nettsidene til Altinn.  

Rapporteringsfrist: seinast 15. i kvar månad etter at slakt, ull og skinn er avrekna.

Rapportar som er sendt etter fristen blir avvist og slakteriet får ikkje utbetalt frakttilskot for den aktuelle månaden.

• kven som rapporterer 
• år og månad rapporteringa gjeld for 
• avrekningsnummer 
• slaktedato
• avrekningsperiode
• informasjon om produsent 
• sone for distriktstilskot kjøt 
• mengd slakt, ull og skinn med referanse til varekode 

MERK! Dersom du registrerer via Altinn må du fylle inn eitt skjema for kvar avrekning. 

I Altinn sender du skjema ved å trykke på «Send inn skjema», når denne knappen blir blå. Blå knapp betyr at skjemaet er klart til å bli sendt inn.

Dersom knappen er grå, er ikkje skjemaet rett utfylt og du kan ikkje sende inn. Sjå etter raud strek under felta som manglar informasjon, eller som ikkje er korrekt utfylte. Når alle felt er rett utfylte, blir «Send inn skjema»-knappen blå og du kan sende inn skjemaet.

Når du har sendt skjemaet, blir opplysningane lagra i Leveransedatabasen. Registrerer du via Altinn får du kvittering på at opplysningane er lagra, i skjermbiletet.

Når Landbruksdirektoratet har fått dataene, førebur direktoratet utbetaling/fakturering. Det blir refundert tilskot som slakteriet eller ullstasjonen har utbetalt til produsentane, med avgifter trekt frå, og det blir utbetalt eventuelt frakttilskot til slakteriet. Ved behov for meir informasjon, kan Landbruksdirektoratet be om dette.

Rapporteringa kan bli tatt ut i kontroll. Du pliktar å godta kontroll, gi nødvendige opplysningar og hjelpe til med å gjennomføre kontrollen. Kontrollar kan gjere at saksbehandlinga tar lenger tid.

Får slakteriet eller ullstasjonen meir i tilskot enn dei skal betale i avgifter, blir pengane automatisk overført til konto. Det er Landbruksdirektoratet som utbetaler pengane. Skal slakteriet/ullstasjonen betale meir i avgifter enn dei får refundert i tilskot, får dei ein faktura med normalt 14 dagars betalingsfrist.

Dersom det er gjort feil i utbetalingar, ved regelbrot eller fordi du har gitt feil opplysningar, kan Landbruksdirektoratet krevje tilbakebetaling og/eller avkorte tilskotet.